Aqalmand woh hai jo apne nafs ko tab'e kar le aur mout ke ba'ad ki zindagi ke liye amal kare aur aajiz o bewaqoof woh hai jo apne nafs ko khwahishat par laga de aur rehmat e ilaahi ki aarzu rakhe.
Shaddad bin Aus raziyallahu ana se riwaayat hai k Nabi e Akram (ﷺ) ne farmaya:
"Aqalmand woh hai jo apne nafs ko tab'e karle aur mout ke ba'ad ki zindagi ke liye amal kare aur aajiz o bewaqoof woh hai jo apne nafs ko khwahishat par laga de aur Rehmat e ilaahi ki aarzu rakhe."
Imam Tirmizi kehte hain:-
1:- Ye hadees Hasan hai.
2:- Aur "من دان نفسه" ka matlab ye hai k woh duniya hi mein apne nafs ka muhasba kar le is se pehle k Qiyamat ke roz uska muhasba kiya jaye.
3:- Umar bin Khattab raziyallahu ana kehte hain : Apne nafs ka muhasba karo qabl iske k tumhara muhasba kiya jaye, aur "عرض الاكبر" (Aakhirat ki paishi) ke liye tadbeer karo, aur jo shakhs duniya hi mein apne nafs ka muhasba karta hai qiyaamat ke roz us par hisaab o kitaab asaan hoga.
4:- Maimoon bin Mehran kehte hain : Banda muttaqi o parhez-gaar nahi hota yahan tak k woh apne nafs ka muhasba kare jaisake apne shareek se muhaasba karta hai aur ye khyaal kare k mera khana aur libaas kahan se hai ?
(Tirmizi : 2459)
AQAL-MAND AUR BEWAQOOF
Rasoolullah (ﷺ) ne farmaya : Daana woh hai jo apne nafs ko qaabu mein rakhe aur mout ke ba'ad ke liye amal kare aur nadan woh hai jo apne nafs ko khwahishaat ke peechhe laga de aur Allah se aarzuein bandhe rakhe.
("Tirmizi : 2459)
