BACHCHON KO 8️⃣ CHEEZON KI AADAT DALWAYEIN !
1️⃣SAFAI-SUTHRAI:-Hamare pyare Nabi (ﷺ) ne 1400 saal qabl ye umdah khaslat in Alfaz mein bayan farmayi thi k "safai nisf iman hai." Lihaza zaroori hai k ham apne bachchon ko ye usool baar-baar batayein aur is par dar-aamad ko yaqeeni banayein.
2️⃣NAMAZ AUR DUA:-Bachchon ko baa-qaaidgi se namaz ka kahein aur Allah se maangne ki aadat daalein. Is tarah bachche na sirf zaahiran saaf-suthre rahenge balke unka baatin bhi nikhrega.
3️⃣SABKI IZZAT KARNA AUR SABKI KHAIR-KHWAHI:-Bachchon ko batayein k sirf badon ke sath hi nahi balke apne ham-umar bachchon ke sath bhi tameez se paish aana hai. Unhein batayein k doosre bachche jaisa bhi sulook karein lekin unhein hamesha tameez se paish aana hai. Neez logon ke sath hamdardi aur khair khwahi ke sath paish aane ki aadat pukhta karwayein.
4️⃣SACH BOLNA:-Sach bolne ki aadat dalwayein. Bachchon ke saamne jhoot na bolein agar kabhi bachche ka jhoot saamne aaye to akele mein samjhayein.
5️⃣KHUD- ETIMAADI SE APNE KAAM ANJAAM DENA:-Bachchon par nazar rakhna achchhi baat hai, lekin har waqt saye ki tarah unke sath rehne se bachche mein khud-etimaadi ki kami ho jati hai. Isliye zaroori hai k kadi nigah rakhne ke sath-sath bachchon par bharosa bhi karein, kuchh kaam unke zimme laga kar ghair-mehsoos tareeqe se nigraani karein aur kami kotahi ke bajaye hosla-afzaai karein.
6️⃣AAGE BADHNE KI LAGAN:-Bachchon ko samjhayein unhein koshish karni hai aur koshish , lagan aur Allah ki madad ki buniyaad par woh kaamyaab honge. Bachchon ko ye keh kar mat darayein k mehnat na karne ki wajah se woh fail ya naakaam ho jayenge ya deegar bachche unse aahe nikal jayenge, balke musbat andaz mein unki shakhsiyat aur salaahiyaton ko ubharne ki koshish karein. Agar khuda na khwasta kabhi bachcha naakaam bhi ho jaye to use hargiz dil-bardashta air mayoos na hone dein balke hamesha aage dekhne aur badhne ka walwala unmein paida karein.
7️⃣KIFAAYAT-SHUA'RI:-Walidain kitne hi maal-daar kyon na hon, bachchon ko awail umri mein paise na dein, agar kabhi paise dein to is baat ko yaqeeni banayein k paise kifaayat-shua'ri se istemaal hon. Agar bachche paison aur cheezon ke istemaal mein laa-parwaahi se kaam lein to unhein paise ka istemaal danish-mandi se karne ke tareeqe sikhayein. Aaj ki ye aadat sari umr unke kaam aayegi.
8️⃣RAAT JALDI SONA AUR SUBAH SAWERE BAIDAARI:-Ghar ka nizaamul awqaat tarteeb dein, jis mein 24 ghante ke mamulaat darj hon aur woh nizaamul-awqaat ko kisi munaasib jagah aawezaan kar dein. Nizaamul-awqaat sab se ahem cheez raat jaldi sokar subah sawere bidaar hona hai. Subah sawere Fajar ki namaz baa-jamaa'at padh kar bachchon ke sath chehel-qadmi aur warzish ka ma'mool banayein.
Bachpan ki aadaat , Budhape aur Qabr tak sath jati hain. Achchhi aadaat parwaan chadha kar ham apne bachchon balke aane waali naslon ko misaali zindagi de sakte hain.
