AAPAS MEIN KEENA O BUGHZ RAKHNE WALON KA ANJAM
Hazrat Abu Huraira h rz. se riwaayat hai k Rasoolullah (ﷺ) ne irshad farmaya: Har hafte mein 2 din do-Shamba (Peer) aur panj-shamba (Jum'eraat) ko logon ke a'amaal paish hote hain, to har banda e momin ki muafi ka faisla kar diya jata hai, siway un 2 aadmiyon ke jo ek-doosre se keena rakhte hon, pas unke bare mein hukm de diya jata hai k in dono ko chhode rakho ( yani inki muafi na likho) jab tak k ye aapas ke is keena aur dushmani se baaz na aayein aur dilon ko saaf na kar lein.
(Sahih Muslim)
TASHREEH:- Is Hadees ki tashreeh ek doosri riwayat se hoti hai jisko Imam Manzari ne Targheeb o Tarheeb mein Ausat Tibrani ke hawale se naqal kiya hai, Ismein farmaya gaya hai k har do-shamba (Peer) aur panj-shamba (Jume'rat) ko logon ke a'amaal paish hote hain to jisne tauba ki hoti hai uski tauba qubool ki jati hai lekin baham keena rakhne walon ke a'amaal unke keena ke sabab lauta diye jate hain (yani unki muafi aur tauba ki qubooliyat ka faisla bhi nahi kiya jata) jab tak k woh is se baaz na aayein.
