MUSAAFIR KI NAMAAZ
WA IZAA ZARABTUM FIL ARZI FA LAISA ALAIKUM JUNAAHUN AN TAQSAROO MINASSALAATI. (SURAH ANNISAA 101)
TARJUMA-Aur jab tum safar karo zameen me to tum par gunaah nahi ki kuchh kam karo namaaz me se-
*Shariat me musaafir usko kehte hain jo apne sheher se baahar itni door jaane ka iraadah karke nikle jahaan darmiyaani darje ki chaal se teen din me pahunche aur apni manzil par pahunch kar 15 din se kam ke qayaam ka iraadah ho.
(Is musaafat ka andaazah sheher ki aabaadi ke ikhtitaam se is jagah tak ka faasla 77 km/48 meel ka hai)
*Aise musaafir ko zuhar,asar, aur ishaa ki farz namaazon me qasar karna chahiye goyaa chaar rakat farz ki bajaay sirf 2-2 rakat farz adaa karna chahiye lekin fajr aur maghrib ki farz namaazon me koi qasar nahi isi tarah witron,sunnaton aur nawaafil me bhi koi qasar nahi.
*albatta dauraan safar sunnaten,nawaafil muaaf hain lekin bilaa uzar nahi chhodna chaahiye.
*Agar musaafir ek muqeem imaam ki iqtadaa me namaaz padhta hai to use zuhar ,asar aur ishaa k farz pure 4-4 hi padhne honge.albatta niyat ye karega ki mai maslan zuhar k farz padhtahun is imaam ke peechhe chaar rakaton ki niyat nahi karega.
*Agar imaam musaafir ho aur muqtadee muqeem to musaafir imaam par laazim hai ki muqtadiyon ko bataa de ki woh apni namaaz qasar karke khatm kar dega lekin muqeem muqtadiyon ko musaafir imaam k salaam phairne ke baad khaamoshi se baghair qiraat ke apni rakaton ko mukammal kar lenaa chaahiye.
