SALAAT-UT-TASBEEH
Is Namaaz ki bahut zyaadah fazeelat Hadeeson me aayi hai.
Hazrat Abdullaah bin Abbas Rz. farmaate hain ki Nabi Kareem S.A.W. ne apne chacha Abbas bin Abdul Muttalib se farmaaya ki A Abbas! A chacha Jaan! Kya mai tumko ek atiya dun? Kya tumko kuchh bakhshish karun? Kya tumko bahut mufeed cheez se baa-khabar kar dun? Kya tumko aisi cheez dun jab tum isko karoge to Allaah tumhare sab gunaah pehle aur pichhle,puraane aur naye,ghalti se kiye hue aur jaankar kiye hue,chhote aur bade, chhipkar kiye hue aur zaahir kiye hue sab muaaf farmaa dega woh kaam ye hai ki 4 rakat namaaz (Salaat-ut-tasbeeh)is tarah padhen-
Jab Alhumdu shareef aur surah padh chuko to khade hi khade rukoo se pehle kalima som
سبحٰن اللّٰه والحمد للّٰه ولا الٰه الاللّٰه واللّٰه اكبر
15 martaba kaho phir rukoo karo to rukoo me kalima som 10 martaba kaho,phir rukoo se khade hokar (qauma me) 10 martaba kaho,phir sajdah me jaakar 10 martaba kaho,phir sajdah se uthkar (dono sajdon ke darmiyaan baithkar) 10 martaba padho,phir doosra sajdah karo aur usme bhi 10 martaba padho,phir sajdah se uthkar baith jaao aur 10 martaba padho, isi tarah 4 rakaten padhlo ,ek rakat me 75 martaba hue aur 4 rakaton me milaakar 300 martaba hue.
Ye tarkeeb bataakar Rasool Allaah S.A.W. ne farmaaya ki agar ho sake to rozaana ek martaba isko padh liya karo, yena karo to Jumaa me (hafte me 1 martaba) padh liya karo ,ye bhi na karo to Maheene me 1 martaba padh liya karo,ye bhi na karo to har saal 1 martaba padh liya karo, ye bhi na karo to umar bhar me 1 martaba to padh hi lo. (Abudaaood, Ibn e Maaja, Bayhaqi,Tirmizi)
Note:- Ye hadees zaeef hai baaz ulema ne ise mouzoo bhi kaha hai jo na padhe use bura na kahen jo padhle ,padhle.
FAYDAH:-
* Ye namaaz har waqt ho sakti hai siwaay un waqton ke jinme nafil padhna makrooh hai.
*Behtar ye hai ki is namaaz ko zawaal ke baad zuhar se pehle padh liya kare jaisa ki ek hadees me (baad zawaal) ke alfaaz aaye hain lekin baad zawaal mouqa na mile to jis waqt chaahe padhle.
* Baaz riwaayaat me in 4 kalmon yani
سبحٰن اللّٰه والحمد للّٰه ولا الٰه الاللّٰه واللّٰه اكبر
ke saath
WALAA HAWLA WALAA QUWWATA ILLAA BILLAAHIL ALIYYIL AZEEM
ولا حول ولا قوة الا باللّٰه العلى العظيم
. bhi aaya hai lihaaza isko bhi mila liya jaaye to achchha hai.
*Doosri aur chouthi rakat me ATTAHIYYAAT se pehle in kalimaat ko 10 martaba padhe, Rukoo aur sajdah me pehle rukoo-o-sajdah ki tasbeehaat yani SUBHAANA RABBI-YAL AZEEM aur SUBHAANA RABBIYAL A,ALAA padhe aur baad me in kalimaat ko padhe.
Doosra Tareeqa is Namaaz ko padhne ka ye hai-
Pehli rakat me SANA ke baad ALHUMDU SHAREEF se pehle in kalimaat ko 15 martaba padhe, phir Surah Faatiha aur SURAH ke baad 10 martaba padhe aur baaqi sab tareeqa pehle ki tarah hai jo pehle guzra, ab is soorat me doosre sajdah ke baad baith kar pehli aur teesri rakat me in kalimaat ko padhne ki zaroorat nahi rahegi aur doosri aur chouthi rakaat me ATTAHIYYAAT se pehle inko padha jaayga kyonki har rakat me doosre sajdah tak hi pahunch kar hi 75 ki taadaad poori ho jaaygi.
ulema ne likha hai ki behtar ye hai ki dono tareeqon par amal kar liya jaaye.
Hazrat Abdullaah bin Almubaarak jo imaam Abu Haneefa Rh. ke shaagird aur Imaam Bukhaari Rh. ke ustaadon ke ustaad hain is Namaaz ko isi tareeqe se padha karte the jo baad me zikr kiya. Hazrat Abdullaah bin Abbaas Rz. Ye Namaaz gar Jumaa ko padha karte the aur Abul Jouz Taabaee rozaana zuhar ki azaan hote hi Masjid me jaate the aur jamaa,at khadi hone tak padh liya karte the. Hazrat Abdul Azeez bin Abi Rawaad Rh. Farmaate the jise jannat darkaar ho use chahiye Salaatuttasbeeh mazboot pakde. Abu Usmaan Khairi Rh. Farmaaya karte ki ghamon aur museebaton ko door karne ke liye Salaat-ut-tasbeeh jaisi behtar koi cheez maine nahi dekhi.
* Is Namaaz ke liye koi Surah muqarrar nahi hai jo bhi Surah chahe padhle. Baaz riwaayaton me hai jo sooraten padhe 20 aayaton ke qareeb-qareeb hon.
* In tasbeehaat ko zabaan se hargiz na gine kyonki zabaan se ginne se namaaz toot jaayegi, ungliyaan jis jagah rakhi hon unko wahin rakhe rakhe dabaata rahe.
*Agar kisi jagah padhna bhool jaaye to doosre rukn me usko poora kar le. Albatta bhooli hui tasbeehaat ki qazaa rukoo se khade hokar aur sajdon ke darmiyaan na kare isi tarah pehli aur teesri rakat ke baad jab baithe to usme bhi bhooli hui tasbeeh ki qaza na kare balki inki tasbeehaat 10-10 martaba padhle aur unke baad jo rukn ho unme bhooli hui tasbeehaat adaa kare.
*Agar kisi wajah se sajdah sahoo paish aajaaye to usme tasbeehaat na padhe Albatta kisi jagah bhoole se tasbeehaat padhna chhod aaya ho jisse 75 ki taadaad me kami ho rahi ho aur ab tak qazaa na ki ho to usko sajdah sahoo me poori karle.
NIYAT:- Niyat karta hun 4 rakat Namaaz nafil SALAAT-UT-TASBEEH ki , waaste Allah Ta,aala ke rukh mera qible ki taraf ALLAAHU AKBAR.
