HAALAT E HAIZ MEIN MAH E RAMAZAN SE ISTIFAADAH !
Bahut C khawateen ramazan mein or bil-khusoos aakhiree ashre mein khas bimari shuru ho jane se sakht takleef ka shikar ho jati hain or ye soch-soch kar pareshan hoti hain k ab aakhiree ashre ki ibadaat , taaq raton aur lailatul qadr ka kya banega ?
Aisi tamaam khawateen darj e zel 3️⃣ nikati agenda par amal-paira ho kar lailatul-qadr samet aakhree ashre ki barkaat se istifadah kar sakti hai:
1️⃣ Niyat ki durustgi
Khuloos e niyat ke sath ye soche k ye sharaee uzar Allah ki taraf se hai aur agar ye uzar na hota to mai behtareen andaz mein ibadaat mein mashghool hokar apne rab ko razi karti. Isi achchhi niyat aur irade par maqbool e ibaadaat ka insha,Allah ajr o sawab milega. Nabi e Kareem (ﷺ) ne ghzwa e tabook ke mouqe par irshad farmaya k kuchh log Madina mein hamare peechhe reh gaye hain lekin ham kisi bhi ghaati ya wadi mein (jihad ke liye) chalein to woh sawab mein hamare sath hote hain. Phir Aap (ﷺ) ne irshad farmaya : ye woh log hain jo uzar ki waja se hamare sath shareeq nahi ho sake.
(Sahih Bukhari : 2684)
2️⃣ Ibaadaat karne waliyon ke sath ta'awun
Aisi khwateen ibadaat, taraaweeh aur tahajjud mein masroof ghar ki deegar khwateen ke sath ta'awwun karke unki ibadaat ke barabar ajr o sawab hasil kar sakti hain. Ye ta'awwun unke kaam nipta kar, unke liye sehri o iftaari tayyar karke , unke bachche sambhal kar deegar tareeqon se kiya ja sakta hai.
3️⃣ Zikr o azkaar aur duaaon mein mashghooliyat
Napaki ki haalat mein har ibaadat mamno'o nahi hoti balke zikr o azkar aur duaayein mangi ja sakti hain. Lihaza aisi tamam khwateen ibadaat se bilkulya kinarah-kashi ikhtiyar na karein balke zikr-azkaar, durood shareef , Shab e qadar ki masnoon duaa aur deegar duaaon mein mashghool reh kar akheer ashre , taaq raaton aur shab e qadar ki barakaat haasil karne ki koshish karein.
