Mujhe Sab Se Ziada Dar Is Zaban Se Lagta Hai Ke Gunah Ki Aksar Baaten Is Se Sarzad Hoti Hain, Lihaza Is Zaban Ke Fitne Se Bacho
Bhaiyo aur Behno Islaam Akhlaaq ki taleem deta hai aur Har Musalman ko chahye ke wo Islami taleemaat par amal kare.
aj kal ye baat mushahede me aarahi hai ke
Musalman Fohosh goi aur gaaliyan de rahe hain.
Wo log ko chordiye jo Islam bus naam ke hai un logon ko bhi bakasrat dekha jaaraha hai jo Islaam ke saheeh pairokaar hone ke daawe to kar rahe hain magar wo bhi Fohosh goi ka shikaar hai.
Meri Guzarish hai sab se ke har koi In ahaadees ko padh kar khud ka jayeza len ke mai apni zaban ki kitni hifazat kar raha hun.
1.Hazrat Sahal Bin Sa’ad Razi Allahu Anahu Kehte Hain Ke Rasoolullah Sallallahu Alaihi Wasallam Ne Farmaya :
“Jo Shakhs Mujhe Is Baat Ki Zamanat De Ke Wo Apni Us Cheez Ki Hifazat Karega Jo Uske Dono Jabdon Ke Darmiyan Hai Yani Zaban Aur Jo Us Ke Dono Paaon Ke Darmiyan Hai Yani Sharmgah To Mai Us Ki Jannat Ki Zamanat Leta Hun.”
(Bukhari)
2.Hazrat Abdullah Bin Masood Razi Allahu Anhu Se Riwayat Hai Ke Allah Ke Rasool Sallallahu Alaihi Wasallam Ne Irshad Farmaya:
“Musalman Ko Gaali Dena Fisq( Gunah ) Hai Aur Uska Qatl Karna Kufr Hai”
(Bukhari O Muslim)
3.Hazrat Abdullah Bin Umar Razi Allahu Anhu Se Riwayat Hai Ke
Allah Ke Rasool Sallallahu Alaihi Wasallam Ne Farmaya:
“Jis Shakhs Ne Apne Musalman Bhai Ko Kaafir Kaha To Un Dono Me Se Ek Par Kufr Laut Gaya (Ya To Kehna Wala Khud Kaafir Hogaya Ya Wo Shakhs Ke Jis Ko Usne Kaafir Kaha Hai.)”
(Bukhari O Muslim)
4.Hazrat Abu Zar Razi Allahu Anhu Se Riwayat Hai Ke Rasoolullah Sallallahu Alaihi Wasallam Ne Irshad Farmaya :
“Koi Shakhs Kisi Aadmi Ko Fasiq Na Kahe Aur Na Us Par Kufr Ki Tohmat Lgaye Kyu Ke Agar Wo Aadmi Fasiq Ya Kufr Ka Haamil Nahi Hai To Us Ka Kaha Hua Usi Ki Taraf Laut Jayega.”
(Bukhari)
5.Hazrat Abu Darda Razi Allahu Anhu Se Riwayat Unho Ne Farmaya Ke Maine Nabi Kareem Sallallahu Alaihi Wasallam Ko Ye Farmate Hue Suna Ke Jo Log Bhot Ziada Lanat Kiya Karte Hain Wo Qayamat Ke Din Na Gawah Banaye Jayenge Aur Na Shifa’at Karsakenge.
(Muslim)
6.Hazrat Abu Huraira Razi Allahu Anhu Ne Farmaya Ke Allah Ke Rasool Sallallahu Alaihi Wasallam Ne Irshad Farmaya
“Qayamat Ke Din Sab Se Badtar Shakhs Wo Hoga Jo Fitna Angezi Ki Khaatir Do Muh Rakhte Hai Yani Munafiq Ki Khaasiat O Sifat Rakhte Hai Ke Wo Ek Jamat Ke Paas Aata Hai To Kuch Kehta Hai Aur Doosri Jamat Ke Paas Aata Hai To Kuch Kehta Hai.”
(Bukhari O Muslim)
7.Hazrat Abu Huraira Razi Allahu Anhu Se Riwayat Hai Unho Ne Farmaya Ke Allah Ke Rasool Sallallahu Alaihi Wasallam Ne Farmaya:
“Jaante Ho Logon Ko Aam Taur Par Kaun Si Cheez Jannat Me Daakhil Karti Hai? Wo TAQWA Yani Allah Se Darna Aur Husne Khulq Yani Ache Akhlaaq Hain
Aur Jaante Ho Logon Ko Aam Taur Par Kaun Si Cheez Dozakh Me Lejati Hai?
Wo Muh Aur Sharmgah Hain.”
(Tirmizi , Ibne Maja)
8.Hazrat Abdullah Bin Amr Razi Allahu Anhu Se Riwayat Hai Unho Ne Farmaya Ke Allah Ke Rasool Sallallahu Alaihi Wasallam Ne Irshad Farmaya
“Jo Khamoosh Raha Usne Najaat Paayi.”
(Musnad Ahmad,Tirmizi,Darimi,Baihaqi Shobul Iman)
9.Hazrat Uqba Bin Amir Razi Allahu Anhu Se Riwayat Hai Unho Ne Farmaya Maine Rasoolullah Sallallahu Alaihi Wasallam Se Mulaqaat Ki Aur Arz Kiya Ke Najaat Ka Kya Zarya Hai?
Aap Sallallahu Alaihi Wasallam Ne Irshad Farmaya:
“Apni ZABAN Ko Qaabo Me Rakho Tumhara Ghar Tumhari Kifayat Kare Aur Apne Gunahon Par Ro’o.”
(Musnad Ahmad , Tirmizi)
10.Hazrat Abu Sayeed Khudri Razi Allahu Anhu Se Riwayat Hai Wo Allah Ke Rasool Sallallahu Alaihiwa Salalm Se Batareeq Marfoo Naqal Karte Hain Ke Aap Sallallahu Alaihi Wasallam Ne Farmaya:
“Jab Aadmi Subah Karta Hai To Saare A’azaa (Body Parts) Zaban Ke Saane Aajizi Karte Hain Aur Kehte Hain Ke Hamare Haq Me Allah Se Dar Kyu Ke Hamara Talluq Tujh Hi Se Hai. Agar Tu Seedhi Rahegi To Hum Bhi Seedhe Rahenge Aur Agar Tu Tedhi Hogi To Hum Bhi Tedhe Hojayenge.”
(Tirmizi)
11.Hazrat Ali Bin Hussain Razi Allahu Anhu Se Marwi Hai Ke Allah Ke Rasool Sallallahu Alaihi Wasallam Ne Irshad Farmaya
“Insaan Ke Islam Ki Khoobi Ye Hai Ke Wo LAA YANI Baton Ko Chord De.”
(Musnad Ahmad, Mota Malik)
12.Sufyan Bin Abdullah Saqafi Razi Allahu Anhu Kehte Hain Ke (Ek Din) Maine Arz Kiya Ke Aye Allah Ke Rasool Sallallahu Alaihi Wasallam! Ap Mere Bare Me Jin Cheezon Se Darte Hain Un Me Sab Se Ziada Khaufnaak Cheez Kaun Si Hai?
Hazrat Sufyan Kehte Hain Ke Huzoor Sallallahu Alaihi Wasallam Ne (Ye Sun Kar) Apni Zuban Mubarak Pakda Aur Farmaya Ke Ye Cheez (Yani Tumhare Bare Me Mujhe Sab Se Ziada Dar Is Zaban Se Lagta Hai Ke Gunah Ki Aksar Baaten Is Se Sarzad Hoti Hain, Lihaza Is Zaban Ke Fitne Se Bacho.)
(Tirmizi)
13.Hazrat Abdullah Bin Masood Razi Allahu Anhu Farmate Hain Ke Allah Ke Rasool Sallallahu Alaihi Wasallam Ne Farmaya.
“Momin Na To Ta’n Karne Wala Hota Hai Na Lanat Karne Wala , Na Fohosh Gaoi Karne Wala Hota Hai, Na Zaban Darazi Karne Wala.”
(Tirmizi , Baihaqi)
14.Hazrat Anas Razi Allahu Anhu Se Riwayat Hai Ke Rasoolullah Sallallahu Alaihi Wasallam Ne Farmaya:
“Jis Cheez Me Badgoi Aur Sakht Kalami Ho Us Ko Aib Daar Banadeti Hai Aur Jis Cheez Me Hayaa Aur Narmi Ho Us Ko Zeb O Zeenat Ata Karti Hai.”
(Tirmizi)
Dubara Ghaur Se In Ahadees Ko Padhiye Aur Khud Ka Muhaseba Karen Ke Hum Zaban Ki Kitni Hifazat Kar Rahe Hain Aur Hum Se Is Zaban Ki Kitne Gunah Sarzad Horahe Hain.
Allah Ta’ala Se Dua Hai Ke Hum Ko Apni Zaban Ko Qaabo Me Rakhne Ki Taufeeq Naseeb Farmaye.
Aameen Ya Rabbal Aalameen.
Note:- In Tamam Hadeeson Ko Mishatul Masabeeh Kiabul Adab Ke Baab Hifzul Lisaan Se Intekhaab Kar Ke Liya Gaya Hai.
