SHA'ABAAN-UL-MU'AZZAM ME SARKAAR-E-DO AALAM S.A.W. KA MA'AMOOL
Ramzaan-ul-mubaarak ke barkaton waale Maah-e-mubaarak ke aane se qabl Sha'abaan-ul-muazzam me hi Sarkaar-e-do Aalam S.A.W. uske istaqbaal ke liye kamar-basta ho jaate, Aap S.A.W. ki ibaadaat me izaafa ho jaata ,na sirf khud balki is fikr me Aap S.A.W. apni ummat ko bhi shareek farmaate the .
Aap S.A.W. ne "Ramzaan-ul-mubaarak" ke saath uns paida karne ke liye Sha'abaan-ul-mu'azzam ki 15vi raat aur us din ke roze ki targheeb di hai aur is baare me sirf zabaani targheeb par hi iktafaa nahi farmaaya balki Aap S.A.W. amli taur par khud is maidaan me sabse aage nazar aate hain ; chunanche is maah ke shuru hote hi Aap S.A.W. ki ibaadaaat me ghair ma'amooli tabdeeli nazar aati jiska andaazah ummul-mu'mineen,Hazrat Aisha Rz. ke is irshaad se ba-khoobi lagaaya jaa sakta hai ,Aap farmaati hain : k "Maine Aap S.A.W. ko sha'abaan ke alaawah kisi aur maheene me kasrat se [nafli] roze rakhte nahi dekha" (Saheeh Muslim) Huzoor-e-paak S.A.W. ke sha'abaan-ul-mu'azzam me ba-kasrat rozah rakhne ki wajah se is maheene me rozah rakhne ko Allaama Noovi Raheemahullaah ne masnoon qaraar diya hai.
Mazkoorah hadees Aisha Rz. aur deegar bohot si ahaadees se andaazah hota hai Aap Alaihis-salaatu-Assalaam ka ye amal aur ummat ko targheeb dena istaqbaal ramzaan ke liye hota tha jiski taraf Hazrat Hakeem-ul-ummat Moulaana Ashraf Ali Thaanvi Rh. irshaad karte hue farmaate hain k ab khaas is rozah ki hikmat bhi samajhiye, mere nazdeek ye hai k Rasoolullaah S.A.W. ne ramzaan se pehle nisf sha'abaan ka rozah ramzaan ke namoone ke liye masnoon farmaaya hai taake ramzaan se wehshat-o-haibat na ho k na-ma'aloom rozah kaisa hoga? aur kya haal hoga ? isliye Aapne 15 sha'abaan ka rozah muqarrar farmaa diya k is din ka rozah rakh kar dekh lo chunke ye ek hi rozah hai isliye iski himmat aasaani se ho jaati hai , jab woh poora ho gaya to ma'aloom ho jaata hai k bas ramzaan ke roze bhi aise hi honge aur is taareekh me raat ki ibaadat bhi taraaweeh ka namoona hai , isse taraaweeh ke liye hosla badhta hai k jab zyaadah raat tak jaagna kuchh bhi ma'aloom na hua to taraaweeh ke liye ek ghanta zyaadah jaagna kya ma'aloom hoga ?! bas ye i'aanat bil-misl alal-misl hui.
SHAB-E-BARA'AT KE FAZAAIL
Ab ek nazar is maah-e-mubaarak ki 15vi shab par bhi daal li jaaye Jis ke baare me bhi bahut kuchh ahaadees me mazkoor hain, zamaana-e-maazi aur moujoodah zamaane me log is raat ke baare me ifraat-o-tafreet ka shikaar nazar aate hain, is raat ke baare me shari'at ka saheeh moaqqaf :
SHAB-E-BARA'AT KE BAARE ME NABI-E-AKRAM S.A.W. KE FARAAMEEN
1- Hazrat Abu Bakar Siddeeq Rz. Nabi-e-Kareem S.A.W. se riwaayat karte hain k "Aap S.A.W. ne farmaaya k Allaah Azz-o-jall 15vi sha'abaan ki raat me aasmaan duniya ki taraf (apni shaan ke mutaabiq) nazool-ajlaal farmaate hain aur is raat har kisi ki maghfirat kar di jaati hai ,siwaay Allaah ke saath shirk karne waale ke ,ya aise shakhs ke jiske dil me bughz ho. "
2-"Aap S.A.W. ne irshaad farmaaya (A Aisha) Jaanti bhi ho ye kounsi raat hai ? Maine arz kiya k Allaah aur uske Rasool hi zyaadah jaante hain , farmaaya ye sha'abaan ki 15vi shab hai Allaah Azz-o-Jall is raat apne bandon par nazar-e-rehmat farmaate hain aur bakhshish chahne waalon ki maghfirat farmaate hain , reham chahne waalon par reham farmaate hain aur dilon me kisi musalmaan ki taraf se bughz rakhne waalon ko unki haalat par hi chhod dete hain."
3-Hazrat Abu Moosa ash-ari Rz. Rasoolullaah S.A.W. se riwaayat farmaate hain k "Aap S.A.W. ne farmaaya Allaah ta'aala sha'abaan ki 15vi raat rehmat ki nazar farmaa kar tamaam makhlooq ki maghfirat farmaa dete hain , siwaay Allah ke saath shirk karne waale aur kisi musalmaan ki taraf se bughz rakhne waalon ke ."
4-Hazrat Abdullaah Bin Umar-o-Bin Aas Rz. se riwaayat hai k "Rasool-e-Akram S.A.W. ne farmaaya k sha'abaan ki 15vi raat Allaah Azz-o-Jall Apni makhlooq ki taraf rehmat ki nazar farmaate hain , siwaay do shakhson ke baaqi sab ki maghfirat farmaa dete hain , ek keena-war ,doosre kisi ko na-haq qatl karne waala."
5-Hazrat Usmaan Bin Abi-Aas Rz. Nabi S.A.W. se riwaayat karte hain k Aap S.A.W. ne farmaaya k jab sha'abaan ki 15vi raat hoti hai to (Allaah Ta'aala ki taraf se) ek pukaarne waala pukaarta hai , Hai koi maghfirat ka taalib ? ! k Mai uski maghfirat kar dun , Hai koi maangne waala ?!k Mai usko ataa karun, is waqt jo (sachche dil ke saath) maangta hai usko (uski shaan ke mutaabiq) milta hai , siwaay bad-kaar aurat aur mushrik ke ( k ye apni bad-a'amaaliyon ke sabab Allaah ki ataa se mehroom rehte hain).
6-Hazrat Aisha Rz. Nabi-e-Akram S.A.W. se riwaayat farmaati hain k "Aap S.A.W. ne farmaaya k kiya tumhe ma'aloom hai k is raat ya'ani sha'abaan ki 15vi raat me kya hota hai ? unhone daryaaft farmaaya k Ya Rasoolullaah S.A.W.! kya hota hai ? Aap S.A.W. ne farmaaya k is shab me ye hota hai k is saal me jitne bhi paida hone waale hain ,woh sab likh diye jaate hain, aur jitne is saal marne waale hain woh sab bhi is raat likh diye jaate hain , aur is raat me sab bandon ke (saare saal ke ) a'amaal uthaaye jaate hain aur isi raat me logon ki muqarrarah rozi (muqarrarah waqt) par utarti hai ."
7-"Hazrat Ataa Bin Yasaar Rh, farmaate hain k jab sha'abaan ki 15vi raat hoti hai to mout ka farishta ek sha'abaan se doosre sha'abaan tak marne waalon ka naam (apni fehrist se) mitaa detaa hai aur koi shakhs zulm , tijaarat aur koi aurton se nikaah kar raha hota hai is haal me k uska namm zindon se murdon ki taraf muntaqil ho chuka hota hai , Shab-e-qadar ke ba'ad koi raat is raat se afzal nahi , Allaah Ta'aala (Apni shaan ke mutaabiq) Aasmaan-e-duniya par nazool farmaa kar har ek ki maghfirat farmaa dete hain siwaay mushrik , keena-war aur qat'aa-rehmi karne waale ke."
8-"(Huzoor S.A.W. ne farmaaya) Jibraail A.S. mere paas tashreef laaye farmaaya k ye sha'abaan ki 15vi raat hai , Allaah Ta'aala is raat me bahut se logon ko dozakh se aazaad karta hai , jinki ta'adaad "qabeela-e-kalb" ki bakriyon ke baalon se bhi zyaadah hoti hai ,.magar is raat me Allaah Ta'aala mushrik , keena-war, rishte-naate todne waale, izaar (paajaama,shalwaar waghairah) takhnon se neeche rakhne waale (logon) aur Maan-Baap ke na-farmaan aur sharaab ke aadi logon ki taraf rehmat ki nazar nahi farmaate."
9-"Hazrat Usmaan Bin Muhammad Rh. farmaate hain k Rasoolullaah S.A.W. ne farmaaya k (zameen par basne waalon ki) umaren ek sha'abaan se doosre sha'abaan tak tay ki jaati hain , yahaan tak k insaan shaadi-biyaah karta hai aur uske bachche paida hote hain ,haalaanke uska naam murdon ki fehrist me shaamil ho chuka hota hai."
10-Hazrat Abu Darda Rz. farmaate hain k: Jis shakhs ne sawaab ki ummeed se Eiden ki raaton me qayaam kiya (ya'ani ibaadat ke zariye unko zindah kiya) to uska dil is (wehshat waale) din zindah rahega , jis din logon ke dil (qayaamat ki haulnaakiyon ki wajah se) murdah ho jaayenge , "Imaam Shaafa'i Rh. farmaate hain k ham tak ye baat pahunchi hai k 5 raaton me duaaon ko qubool kiya jaata hai , Jum'aa ki raat , Eid-ul-azhaa ki raat, Eid-ul-fitr ki raat , Rajab ki pehli raat , aur Sha'abaan ki 15vi raat "
Mazkoorah irshaadaat ke alaawah aur bahut si riwaayaat me is raat ke fazaail waarid hue hain is waqt in sab ka jamaa karna maqsad nahi , bas ek khaas jehat se ek namoona saamne laaana maqsood hai. Woh khaas pehlu ye hai k mazkoorah tamaam ahaadees me azeemush-shaan fazaail mazkoor hain,wahaan bahut se aise (bad-qismat) afraad ka tazkirah hai , jo is mubaarak raat me bhi Rab Azz-o-Jall ki rehmaton aur bakhshishon se mehroom rehte hain , zel me in gunaahon ka ajmaali tazkirah kiya jaata hai ; taake thoda sa ghour kar liya jaaye k kahin ham bhi in razaail me to mubtala nahi ! Allaah na kare k hamaare andar inme se kuchh ho , aur agar kuchh ho to isse bar-waqt chhutkaara haasil kar saken;
AKAABIREEN UMMAT KE AQWAAL
*Allaama ibn-ul-Haaj Maaliki Raheemahullaah farmaate hain k is raat ke bade fazaail hain aur badi khair waali raat haihamaare islaaf iski badi ta'azeem karte hain aur is raat ke aane se pehle iski tayyari karte the.
*Allaama ibn-e-teemiya Raheemahullaah ke shaagird ibn-e-Rajab hambali farmaate hain k Shaam ke mash-hoor taaba'i Khalid bin Luqmaan raheemahullaah is raat ki badi ta'azeem karte the aur is raat me khoob ibaadat karte . (Lataaif-ul-ma'aarif)
*Allaama ibn-e-Najeem Raheemahullaah farmaate hai k " Sha'abaan ki 15vi raat ko baidaar rehna mustahab hai," (Albehr-ur-raaiq)
*Allaama haskafi raheemahullaah farmaate hain k "Sha'abaan ki 15vi raat ko ibaadat karna mustahab hai." (Addar-ma'addar)
*Allaama Anwar Shah Kashmiri likhte hain k " Beshak ye raat shab-e-bara'at hai aur is raat ke silsile me riwaayaat saheeh hain,"
*Shaikh Abd-ul-Haq Muhaddis Dehelvi Rh. farmaatte hain k "israat baidaar rehna mustahab hai aur fazaail me is jaisi ahaadees ka zikr kioya jaata hai, yahi imaam Awzaa'i ka qaul hai. (Maa sabt bis-sunnah)
*Hakeem-ul-Ummat Hazrat moulaana Ashraf Ali Thanvi Rh. farmaate hain:"Shab-e-bara'at ki itni asal hai ki 15vi raat aur 15va din is maheene ka buzurgi aur barkat waala hai. (Bahishti zewar)
*Kifaayat-ul-Mufti me hai k "Sha'abaan 15vi Shab ek afzal raat hai"
*Fataawa Mahmoodiya me hai k " Shab-e-Qadar-o-Shab-e-bara'at ke liye sharee'at ne ibaadat, Nawaafil , tilaawat , zikr , tasbeeh , Duaa-o-Astaghfaar ki targheeb di hai"
*Mufti Taqi Usmaani Sahib ZM. farmaate hain k "Waqia ye hai k Shab-e-bara'at ke baare me ye kehna bilkul ghalat hai ki iski koi fazeelat hadees se saabit nahi , haqeeqat ye hai k 10 sahaaba karaam Rz. se ahaadees marawwi hain, jinme is raat ki fazeelat Nabi Kareem S.A.W. ne bayaan farmaayi hain , inme ba'az Ahaadees sanad ke aitabaar se beshak kuchh kamzor hain , lekin Hazraat Muhaddiseen ka ye faisla hai k agar ek riwaayat sanad ke aitabaar kamzor ho lekin uski taaeed me bahot si ahaadees ho jaayen to uski kamzori door ho jaati hai . (Islaahi Khutbaat)
*Shaikh Abd-ul-Haq Muhaddis Dehelvi Rh. farmaatte hain k "israat baidaar rehna mustahab hai aur fazaail me is jaisi ahaadees ka zikr kioya jaata hai, yahi imaam Awzaa'i ka qaul hai. (Maa sabt bis-sunnah)
*Hakeem-ul-Ummat Hazrat moulaana Ashraf Ali Thanvi Rh. farmaate hain:"Shab-e-bara'at ki itni asal hai ki 15vi raat aur 15va din is maheene ka buzurgi aur barkat waala hai. (Bahishti zewar)
*Kifaayat-ul-Mufti me hai k "Sha'abaan 15vi Shab ek afzal raat hai"
*Fataawa Mahmoodiya me hai k " Shab-e-Qadar-o-Shab-e-bara'at ke liye sharee'at ne ibaadat, Nawaafil , tilaawat , zikr , tasbeeh , Duaa-o-Astaghfaar ki targheeb di hai"
*Mufti Taqi Usmaani Sahib ZM. farmaate hain k "Waqia ye hai k Shab-e-bara'at ke baare me ye kehna bilkul ghalat hai ki iski koi fazeelat hadees se saabit nahi , haqeeqat ye hai k 10 sahaaba karaam Rz. se ahaadees marawwi hain, jinme is raat ki fazeelat Nabi Kareem S.A.W. ne bayaan farmaayi hain , inme ba'az Ahaadees sanad ke aitabaar se beshak kuchh kamzor hain , lekin Hazraat Muhaddiseen ka ye faisla hai k agar ek riwaayat sanad ke aitabaar kamzor ho lekin uski taaeed me bahot si ahaadees ho jaayen to uski kamzori door ho jaati hai . (Islaahi Khutbaat)
SHAB-E-BARA'AT ME ALLAAH TA'AALA KI REHMAT SE MEHROOM AFRAAD
1-Keena-war ya bughz rakhne waala
2-Shirk karne waala.
3-Na-Haq qatl karne waala
4-Zina-kaar
5-Qat'aa-rehmi karne waala
6-Izaar, paajaama takhno se neeche rakhne waala.
7-Waalidain ki naa-farmaani karne waala
8-Sharaab-noshi karne waala
SHAB-E-BARA'AT KI RASOOMAAT AUR BID'AAT
*Is raat me had se zyaadah ibaadat karna,
*Masjidon ne ijtimaa'i Shab-baidaari karna.
*Makhsoos qism ke mukhtalif tareeqon se nawaafil padhna.
*Nawaafil-o-Tasbeeh Taraaweeh ki jamaa'at karwaana
*Speaker par Na'at khwaani waghairah karna.
*Hotels aur baazaaron me ghoomna.
*Halwa pakaana zaroori samajhna.
*Khaas raat me eisaal-e-sawaab ko zaroori samajhna.
*Qabristaan me charagh jalaana.
*Is raat se pehle Arfa ke naam se ek rasam.
*Is raat me roohon ke gharon me aane ka aqeedah.
*Faut-shudah shakhs ke ghar jaane ko zaroori samajhna.
*Kapdon ka len-den.
*Beri ke patton se ghusal karna.
*Gharon me charaaghaan karna
*Gharon aur Masaajid ko sajaana.
*Is raat me aatish-baazi karna.
Mazkoorah tamaam umoor sharee'at ke khilaaf hain inka koi saboot Nabi-e-Akram S.A.W. , Sahaaba-e-karaam Rz. aur salf saaliheen se nahi milta , isliye in tamaam bid'aat aur rasoomaat ka tark aur muaashre se inko mitaane ki koshish karna har musalmaan par ba-qadr-e-wus'at farz hai.
SHAB-E-BARA'AT ME KARNE KE KAAM
Is mubaarak raat me karne ke kya-kya kaam hain? Unka zikr taake ifraat-o-tafreet se bachte hue is raat ke fazaail ko sameta ja sake:
1-Namaaz isha'a aur Namaaz fajar ko baa-jamaa'at adaa karne ka ehtamaam karna.
2-Is raat me ibaadaat ki taufeeq ho ya na ho , gunaahon se bachne ka khaas ehtamaam karna, bil-khusoos in gunaahon se jo is raat ke fazaail se mehroomi ka sabab bante hain.
3-Is raat me Tauba-o-Astaghfaar ka khaas ehtamaam karna aur har qism ki rasoomaat aur bid'aat se ijtanaab karna.
4-Apne liye aur poori ummat ke liye har qism ki khair ke husool ki duaa karna.
5-Baqadar wus'at zikr-azkaar , nawaafil aur tilaawat-e-Qur-aan paak ka ehtamaam karna.
6-Agar ba-aasaani mumkin ho to 15 sha'abaan ka rozah rakhna.
Waazeh rahe k mazkoorah tamaam a'amaal shab-e-bara'at ka laazmi hissa nahi ; balki inka zikr mehez isliye hai k inme mashghooli ki wajah se is raat ki munkiraat se bacha ja sake.
