Abdul Azeez bin Suhaib ne Hazrat Anas bin Malik Raziyallahu anhu se riwaayat ki, unhone kaha : ek janaazah guzra to uski achchhi sift bayan ki gayi is par Nabi e Akram (ﷺ) ne farmaya : Wajib ho gayi, wajib ho gayi, wajib ho gayi. Iske ba'ad ek aur janaazah guzra to uski buri sift bayan ki gayi to Nabi e Akram (ﷺ) ne farmaya : wajib ho gayi, wajib ho gayi, wajib ho gayi. Is par Hazrat Umar Raziyallahu anhu ne kaha: Aap par mere Maa-Baap fida hon ! Ek Janaazah guzra aur uski achchhi sift bayan ki gayi to aapne farmaya : wajib ho gayi, wajib ho gayi, wajib ho gayi. Ek janaazah aur guzra aur uski buri sift bayan ki gayi to aapne farmaya : wajib ho gayi, wajib ho gayi, wajib ho gayi (iska matlab kya hai?) to Rasoolullah (ﷺ) ne farmaya : Jiski tum logon ne achchhi sifat bayan ki uske liye Jannat wajib ho gayi aur jiski tumne buri sift bayan ki uske liye aag wajib ho gayi, Tum zameen mein Allah ke gawah ho, Tum zameen mein Allah ke gawah ho, Tum zameen mein Allah ke gawah ho.
TUM ZAMEEN PAR BANDON KE HAQ MEIN ALLAH KE GAWAH HO
(Sahih Muslim : 2200)
Rasool e Kareem (ﷺ) ne is bare mein mazeed farmaya hai k : " Jis kisi musalman mayyat ke liye janaazah ki namaz mein ya waise hi aam haalat mein doosre musalman jo duaayein karte hain un par Allah Ta'ala farmata hai : Tum logon ne jo kuchh is mayyat ke bare mein kaha ( ya'ani jo tumne dua ki hai) maine is bare mein iski maghfirat kar di hai." Balke ek riwaayat mein ye bhi aata hai k : " ye bandah bura shakhs hota hai aur uske shar aur burai ke bare mein logon ko ilm nahi hota aur Allah ko to ilm hota hai lekin apne doosre bandon ki duaaon par Allah Ta'ala uske shar o burai ke baa-wujood usko muaaf farma deta hai."
"Maine is mayyat ke bare mein tumhare ilm (duaaon) ko qubool kar liya aur jo kuchh tum nahi jante the us par maine iski maghfirat kar di."
(Sahih ibn e Habaan : 3026 , Masnad Abi Ya'li : 3481)
"Jab kisi bandah ka intiqal hota hai aur Allah ko is bande ki Burai ka ilm hota hai, aur log uski achchhaiyaan bayaan kar rahe hote hain to Allah Izz o Jall farishton se farmate hain : Maine is bande ke liye apne bandon ki gawahi qubool kar li, aur mujhe is bande ki jis burai ka ilm tha maine usko muaaf kar diya."
(At-targheeb o Tarheeb : 5165, Masnadul-bazaar : 865)
TUM ZAMEEN PAR BANDON KE HAQ MEIN ALLAH KE GAWAH HO
Is baare mein ek bahot hi ahem riwaayat woh hai jise Syyedna Anas Raziyallahu anhu ne riwaayat kiya hai, farmate hain : Ek janaazah guzra to logon ne uski ta'reefein ki aur usko achchhe alfaaz se yaad kiya to Nabi e Kareem (ﷺ) ne 3️⃣ baar farmaya : Wajib ho gayi, Wajib ho gayi, Wajib ho gayi. Doosra janaazah guzra to logon ne uski buraiyan bayan ki Nabi e Kareem (ﷺ) ne phir 3️⃣ baar farmaya : Wajib ho gayi, Wajib ho gayi, Wajib ho gayi. Sayyedna Umar raziyallahu ana ne Nabi e Kareem (ﷺ) se mukhatib hokar farmaya : Mere Maa-baap aap par qurbaan ! Ek janaazah guzra aur logon ne use achchhe alfaz se yad kiya to aapne 3️⃣ baar "wajib ho gayi" farmaaya. Doosra janaazah guzra aur logon ne use bure alfaaz se yaad kiya tab bhi aapne 3️⃣ baar "wajib ho gayi" farmaya?
Jawaab mein Rasoolullah (ﷺ) ne irshad farmaya : "Jisko Tumne achchhe alfaaz se yaad kiya uske liye Jannat wajib ho gayi aur jisko tumne bure alfaz se yad kiya uske liye Jahannum wajib ho gayi, Tum log Zameen par bandon ke haq mein Allah ke gawah ho."
(Sahih Muslim : 949, Sahih Al-Bukhari : 1368)
Hamein apne khandaan aur mua'shre mein is baat ki da'wat aam kar dena chahiye k logon ! Marne walon ke liye (khwah ye marne wale bure log hi kyon na ho) hamesha achchhi batein kaho, aur unki maghfirat ki dua karte raho, hamein isi achchhai ka hukm diya gaya hai, mare hue musalmano ke liye hamesha achchhi batein aur duaayein karo.
Ye ek badi neki hai jiska ta'lluq safa e nafs ya'ni dil ki paakeezgi o taqwa se hai k ham har musalman ke bare mein achchha gumaan rakhein, uski khataon, uske gunaahon aur uski buraiyon par pardah dalein aur uski neki o khoobi aur achchhai ko bayan karein, Allah Ta'ala ko ye neki bahot zyadah pasand hai aur Mehboob hai, imaam Fazeel bin Ayaz Rahmatulla alai ne farmaya hai k : Momin ki nishani ye hai k ye doosron ki satar-poshi karta hai, aur naseehat karta hai, jabke munafiq doosron ke raaz faash karta , aur doosron ko bad-naam o ruswa karta hai.
(Jamiul uloom wal-hukm : 71)
Iman ki nishani doosron ke bare mein achchha guman rakhna aur doosron ke liye dua karte rehna hai. Aaj hamare muslim mua'shre mein ham sabko isi imaani nishani aur isi mubarak neki ko apnane ki zaroorat hai, ham apni bhi islah o tarbiyat karein, aur doosron tak bhi ye azeem ne'mat pahunchayein.
