QURAAN MAJEED KI TILAAWAT
RASOOL ALLAAH S.A.W. ne irshaad farmaaya Quraan Majeed padha karo,kyonki woh Qayaamat ke roz sifaarishi ban kar aayega aur bakhshwaayega. (Muslim)
Bayhaqi ne Hadees Naqal ki hai ki Aap S.A.W. ne irshaad farmaaya ki meri ummat ki tamaam ibadaton me Afzal ibaadat Quraan Majeed ka padhña hai.(Bayhaqi)
Imaam Ahmad ne Hadees riwaayat ki hai ki Quraan waale hi Allaah waale aur uske khaas bande hain. (Ahmad)
RASOOL ALLAAH S.A.W. ne irshaad farmaaya:- Tum me Sabse achchha woh shakhs hai jo Quraan seekhe aur sikhaaye. (Bukhari)
RASOOL ALLAAH S.A.W. ne irshaad farmaaya jiske seene me kuchh Quraan na ho to aise hai jaise ujda hua ghar. (Tirmizi,Daarimee)
RASOOL ALLAAH S.A.W. ne Irshaad farmaaya: Jis shakhs ne Kalaamullaah me se ek harf padhaa usko ek neki milti hai aur ek neki 10 neki ke baraabar hai aur mai yun nahi kehta ki ALIF,LAAM,MEEM ek Harf hai balki Alif ek harf hai Laam ek harf aur Meem ek harf hai. (Tirmizi,daarimee)
Musalmaano in Ahaadees me ghaur karo aur Quraan Majeed ka ilm haasil karne aur aulaad ko padhaane ki koshish karo.Agar poora Quran padhne padhaane ki fursat na ho to jitna ho sake uski himmat karo. Ladka ho ya ladki Quraan shareef poora na ho Aadha hi sahi,ye bhi na ho to akheer ki taraf se ek hi manzil padhaa di jaaye usme chhoti-chhoti sooraten hain namaaz me kaam aayengu Algharz sab Mard aur Aurten Quraan padhlen. Agar koi Sipaarah na padh sake to zabaani hi kuchh sooraten yaad karlen aur jo shakhs jitna padhle khwaah poora ho,khwaah thoda, usko hamesha padhta raha kare taaki yaad rahe warna padhaa bepadhaa sab yaksaan ho jaayega.
Agar Quraan haasil karne ki (yani pdhne aur seekhne ki)himmat nahi ya fursat nahi to kisi Quran padhne waale ke paas baithkar sun hi liya kare Hadees Paak me iska bhi sawaab aaya hai.
RASOOL ALLAAH S.A.W. ne irshaad farmaaya jo shakhs Quraan Paak ki ek Aayat sunne ke liye bhi kaan lagaaye uske liye aisi neki likhi jaati hai jo badhti chali jaati hai aur jo is Aayat ko adhega usie liye Qayaamat ke din ek noor hoga. (Ahmad)
ALLAAHU AKBAR !Quran Majeed kaisi badi cheez hai ki jab tak Quraan Majeed padhna na aaye kisi padhne waale ki taraf kaan lagaa kar sun hi liya kare tab bhi sawaab se Maala maal ho jaayega.
Khuda ke Bandon! Allaah ki bandiyon! Ye to kuchh mushkil nahi .
Lekin Afsos hamaare zamaane me Aksar log Quraan Majeed ki taraf se bilkul be tawajjah ho gye hain. Ba,az log to NAOOZBILLAAH iske padhne padhaane ko bekaar samjhte hain aur jo log padhte hain uske yaad rakhne ki fikr nahi karte aur hamesha jo padhte hain uski tas,heeh (Tajweed ke saath padhne)ka ahtamaam nahi karte.
TAMBEEH
Awaamunnaas me mashhoor hai ki dopeher ke waqt Quraan padhna mamnoo hai,so ye ghalat hai, Albatta Namaaz padhna is waqt mamnoo hai ,isi tarah mashhorr hai ki bewuzu Darood Shareef aur Quraan padhna durust nahi ye bilkul ghalat hai.Bewuzu Quraan padhna durust hai Albatta Quraan Shareef ko bila wuzu haath lagaana durust nahi. (Hayaatulmuslimeen)QURAAN MAJEED KI TILAAWAT AUR USKE ZAROORI AADAAB-
Tilaawat e Quraan ke bahut se aadaab hain kuchh Zaahiri kuchh baatini mukhtasar ye ki jab Quraan Majeed padhe to bawuzu ho,kapda paak ho, jagah paak ho, wahaan badboo na ho,Qibla roo ho to behtar hai,Huroof saaf- saaf padhe,jab padhne me dil na lage uswaqt mouqoof karde (yani padhna band karde),padhte waqt dil haazir ho.iska sehel tareeqa ye hai ki tilaawat shuru karne se pehle ye soche ki goya Allaah Ta,aala ne mujhse farmaaish ki hai ki tum kuchh Quraan sunaao aur mai is farmaaish ko poora karne ke liye padhtaa hun aur Allaah ko sunaata hun aur is muraaqbe se tamaam aadaab ki khud Riaayat ho jaayegi.Quraan Majeed ka bahut adab krna chahiye,uski taraf na paanv karo, isse oonchi jagah mat baitho, isko Zameen ya Farsh par mat rakho, balki Rehel ya Takiye par rakho aur agar woh phat jaaye to kisi paak kapde me lapet kar paak jagah par jahaan paanv na pade dafan kardo Aur jab Quraan padha kari to ye dhyan rakho ki Ham Allaah se baaten kar rahe hain,phir dekhna Dil par kaisi Roshni hoti hai. (Yani Dil me noor aur Qalbi sukoon haasil hoga).
(Hayaatulmuslimeen).
