DUAA KI AHEMIYAT AUR USKE AADAAB
HAZRAT ANAS RZ. se riwaayat hai ki RASOOL ALLAAH S.A.W. ne farmaaya: Tum me se har shakhs ko apne Rab se Haajaten maangna chahiye,yahan tak ki usse Namak bhi maange aur Joote ka tasma toot jaaye woh bhi usse maange. (Tirmizi)Faydah: Yani ye khyaal na kare ki aisi mamooli cheez itne bade se kya maange? Beshak unke nazdeek badi cheez bhi chhoti hai.
HAZRAT ABU HURAIRAH RZ. se riwaayat hai ki RASOOL ALLAAH S.A.W. ne irshaad farmaaya ki jo shakhs ALLAAH se Duaa nahi karta ALLAAH TA,AALA us oar Gussa karta hai. (Hayaatulmuslimeen )
1-HAZRAT ANAS RZ. se riwaayat hai ki RASOOL ALLAAH S.A.W. ne Irshaad farmaaya ki Dua Ibaadat ka maghaz hai. (Tirmizi)
2-HAZRAT ABU HURAIRAH RZ. se riwaayat hai ki RASOOL ALLAAH S.A.W. ne Irshaad farmaaya ALLAAH ke nazdeek Duaa se zyaadah Qadar ki koi cheez nahi. (Tirmizi)
3-IBN E UMAR RZ. se riwaayat hai ki Duaa nafa deti hai us museebat se jo naazil ho chuki hai aur us museebat se bhi jo abhi naazil nahi hui. ALLAAH ke bando! Apne zimme Duaa ko laazim karlo. (Tirmizi)
4-HAZRAT JAABIR RZ. Se riwaayat hai ki RASOOL ALLAAH S.A.W. ne farmaaya ki koi shakhs nahi hai jo Duaa maange magar usko ALLAAH TA,AALA usko uski maangi hui cheez dete hain ya koi Buraai usse rok dete hain,jab tak ki Gunaah ya Qata,a Rehmi ki Duaa na kare.(Tirmizi)
Faydah: In Ahaadees se kai baaten maaloom hui jo darj e zel hain.
*Ek to Duaa ki Fazeelat aur taaseer,Aksar log Pareshaani v Museebat ke waqt tarah tarah ki tadbeeren karte hain magar Duaa ki taraf bilkul tawajjah nahi karte,haalaanki wo ahem tadbeer hai.
*Doosri baat ye maaloom hui ki Dua kabhi bekaar nahi jaati ya to wahi cheez mil jaati hai ya koi aane waali balaa tal jaati hai. Ek aur riwaayat ke mutaabiq Aakhirat me uske liye jama ho jaati hai ,baharhaal Duaa zaroor qubool hoti hai.
*Teesri baat ye maaloom hui ki Dua qubool hone ke liye ye bhi shart hai ki Dua khilaaf shara,a na ho aur Huzoor e qalb se ho aur quboolyat ka yaqeen ho.
*Nez Duaa ke qubool hone ki Sharaait me se ye bhi hai ki Haraam Khuraak v Poshaak (yani Haraam Rizq aur Haraam Libaas) se bache.
* Aajkal in sab Sharaait ki taraf se Ghaflat hai.
(Aur phir Shikaayat hoti hai ki Duaa qubool nahi hoti). (Faroouimaan, Hayaatulmuslimeen rooh shasham)
DUAA KI HAQEEQAT
Hazrat Abu Hurairah Rz. se riwaayat hai ki Rasool Allaah S.A.W. ne farmaaya Tum Allaah Ta,aala se aisi haalat me Duaa kiya karo ki tum Duaa ke qubool hone ka Yaqeen Rakha karo aur ye jaan lo ki Allaah Ta,aala ghaflat se bhare dil ki dua qubool nahi karta. (Tirmizi)Duaa sirf is cheez ka naam nahi ki 2-4 baaten yaad karlen aur Namaaz ke baad iski sirf zabaan par aamookhta ki tarah padh diya,ye Duaa nahi hai ,mehez Duaa ki Naqal hai. Duaa ki haqeeqat Allaah Ta,aala ke darbaar me darkhwast paish karna hai. So jis tarah Haakim ke yahaan darkhwaast paish karte hain kam az kam Duaa is tarah to karna chahiye ki darkhwaast dete waqt Aankhen bhi usi taraf lagi hoti hain, Dil bhi hamatan udhar hi hota hai,soorat bhi aajizee ki si hoti hai. Agar zabaani kuchh arz karna hota hai to kaise adab se guftugoo karte hain aur apni darkhwaast manzoor hone ke liye poora zor lagaate hain aur is baat ka yaqeen dilaane ki koshish karte hain ki hamko aapse poori ummeed hai ki hamaari darkhwaast par poori tawajjah farmaayi jaayegi.
To A Musalmaano! Dil me socho kya tum Duaa maangne ke waqt Khuda Ta,aala ke saath aisa hi sulook karte ho? Socho aur Sharmaao. Jab ye bartaav nahi karte ho to apni Duaa ko Duaa yani Darkhwaast kis munh se kehte ho? Haqeeqat me kami tumhaari taraf se hai jisse woh Duaa ,Darkhwaast na rahi. Jab Duaa ki haqeeqat maaloom hoti hai to is Haqeeqat kd muaafiq Duaa maango phir dekho kaisi Barkat hoti hai. (Hayaatulmuslimeen)
