AAKHIRAT KI TAYYAARI

AAKHIRAT KI TAYYAARI

Duniya se Dil na lagaakar Aakhirat ki tayyari karna.
1-Hazrat Huzaifa Rz. Se riwaayat hai ki maine Rasool Allaah S.A.W. se suna Aap S.A.W. farmaate the ki duniya ki Muhabbat tamaam Gunaaho ki Jad hai. (Bayhaqi)
2- Sahal Bin Saad se riwaayat hai ki Rasool Allaah S.A.W. ne farmaaya: Agar duniya Allaah ke nazdeek machchhar ke par ke baraabqr bhi hoti to kisi kaafir ko ek ghoont paani bhi peene ko na deta. (Tirmizi,Ibn e maaja,Ahmad)
3-Hazrat Jaabir Rz. Se riwaayat hai ki Rasool Allaah S.A.W. ka ek mare hue Bakri ke bachche par guzar hua. Aap S.A.W. ne Farmaaya Tum me koun pasand karta hai ki ye Murdaar Bachcha usko ek dirham ke badle me mil jaaye. Logon ne Arz kiya (Dirham to badi cheez hai) Hamto usko bhi pasand nahi karte ki woh hamko adnaa cheez ke badle bhi mil jaaye.
Aap S.A.W. ne farmaaya, Qasam Allaah ki! Allaah Ta,aala ke nazdeek duniya isse bhi zyaadah zaleel hai jis qadar tumhaare nazdeek ye zaleel hai. (Muslim)
4-Ka,ab bin Maalik se riwaayat hai ki Rasool Allah S.A.W. ne farmaaya ki agar 2 bhooke bhedye Bakriyon ke gale me chhod diye jaayen woh bhi Bakriyon ko itna tabaah na karenge jitna Insaan ke Deen ko Maal aur Badai tabah karti hai. (Yani aisi Muhabbat ki usme  deen tabah hone ki bhi parwaah na rahe).(Tirmizi Darimi)
5-Hazrat Abu Hurairah Rz. Se riwaayat hai ki Rasool Allaah S.A.W. ne farmaaya Lazzato ko khatm karne waali cheez yani Mout ko kasrat se yaad kiya karo. (Tirmizi ,Nisai)
6-Hazrat Abdullaah bin Umar Rz. Se riwaayat hai ki Rasool Allaah S.A.W. ne farmaaya : Mout Momin ka tohfa hai. (Bayhaqi)
So tohfe se khush hona chahiye aur agar koi Azaab se darta hai to usse bachne ki tadbeer kare yani Allaah aur uske Rasool ke Ahkaam ko bajaa laaye.
7-Hazrat Ibn e Umar Rz. Farmaaya karte the ki jab Shaam ka waqt aaye to Subah ke waqt ka intizaar mat kari aur jab Subah ka waqt aaye to Shaam ke waqt ka intizaar mat karo. (Bukhari)
8-Abdullaah bin Umar Rz. Se riwaayat hai ki Rasool Allaah S.A.W. ne mere dono shaane (kandhe) phir farmaaya: Duniya me is tarah reh goya tu pardesi hai,balki is tarah reh jaise tu Raaste me chala ja raha hai. (Bukhari)
9-Rasool Allaah S.A.W. ne farmaaya:Mout ko yad karne se Deen me Pukhtagi aur Dil me mazbooti paida hoti hai aur uska tareeqa ye hai ki hamesha yun socha kare ki Duniya ek adnaa darje ki cheez  aur phir khatm hone waali hai (ek din mar jaana hai) Apni umar to bahut jald guzar jaayegi,Mout bahut jald aa khadi hogi phir lagaataar  ye waqiaat shuru ho jaayenge. Qabar ka sawaab v Azaab,Qayaamat ka hisaab v Kitaab aur Jannatv Dozakh ki Jazaa v Sazaa. (Hayaatulmuslimeen)