GHUSAL KE AHKAAM

 GHUSAL KE AHKAAM

FARAAIZ GHUSAL

Ghusal ke faraaiz ki taadaad 3 hai

1-Kulli karna (isme gharaarah karna ya gale me paani pahunchaana laazim nahi)

2-Naak me paani daalna (iski miqdaar sirf naak ki kachchi haddi tak paani ka pahunchaana laazim hai isse zyaadah nahi baaz logon ko dekhaa hai ki woh paani naak me yun kheenchte hain ki woh baad me unke liye takleef ka baais banta hai)

3-Saare jism ko ek baar dhona.

GHUSAL KI SUNNATEN

Ghusal me sunnaton ki taadaad 6 hain

1-Ghusal ki ibtidaa haath dhone se kare.

2-Satar dhulnaa khwaah wahaan nijaasat ho ya na ho.

3-Apne badan par lagi nijaasat ko zaail kare.

4-Ghusal se qabl apne qadam dhone ke alaawah mukammal wuzu karle.

5-Teen martabaa apne saare jism par paani bahaaye.Paani daalne me ibtida sir se kare,phir daahini taraf badan par paani daale ,phir baanyi taraf

6-Apne paanv na dhoye albatta agar kisi lakdi ya patthar ya eint ya isi tarah ki kisi oonchi cheez par khadaa hua ho to paanv dhole.
7-Pay dar pay yani lagataar a,azaa ko dhona.

GHUSAL KE MUSTAHBAAT

Ghusal me mustahbaat ki taadaad 6 hain

1-Aisi jagah ghusal karen jahaan bepardagi na hoti ho.

2-Bila wajah apne satar ko na dekhe.

3-Dauraan ghusal baaten na kare.

4-Apne paanv sabse aakhir me dhoye.

5-Ghusal ke baad touliya waghairah se apna jism saaf karlen.

6-Ghusal ke baad NABI(S.A.W.) par darood padhe. (Kyonki aapki wajah se ALLAAH TA, AALA ne tahaarat ke ahkaamaat inaayat farmaaye)

MOJJIBAAT GHUSAL

Mojjibaat ki 2 qisme hain

1- QISM HAQEEQI :-Ye woh hai jisse haqeeqat me ghusal laazim hota hai jaise manee ka shahwat aur josh ke saath mard ya aurat ke jism me se sote ya jaagte ki haalat me ikhraaj hona,aur aurat ka haiz ya nifaas se paak hona.

2-QISM HUKMI:-Jisse ghusal hukman laazim hota hai jaise aadmi ka sone se bedaar ho  aur apne kapdon me manee dekhe ya kuchh bhi magar pehchaan na ho sake ki manee hai ya mazee  magar ahtalaam yaad na ho to is soorat me ghusal ka hukm ahtiyaatan diya jata hai.

MASNOON GHUSAL KE MOUQE

IMAAM E AAZAM ke nazdeek masnoon ghusal ke kul 4 maqaamaat hain

1-Namaaz juma ke liye ghusal karna.

2- Eiden ke liye ghusal karna.

3-Youm e arfa ke liye ghusal karna.

4-Meeqaat se ahraam baandhne ke liye ghusal karna.

MAKROOHAAT E GHUSAL

1-Ghusal karte waqt bila libaas hone ki haalat me Duaa padhna ya Qible ki taraf rukh karna.

2-Zyaadah paani bahaana.

3-Itna kam paani lena ki Ghusal achchhi tarah na ho sake.

4-Bila libaas hone ki haalat me kalaam karna.

5-Sunnat ke khilaaf ghusal karna.