WUZU KE AHKAAM

WUZU KE AHKAAM

WUZU KE FARAAIZ KA BAYAAN

Wuzu ke faraaiz ki taadaad 4 hain

1-Chehra dhona (iski miqdaar paishaani ke baalon se lekar thodi ke neeche tak aur dono me ek kaan ki lo se doosre kaan ki lo tak dhona)

2-Dono ha.ath kuhaniyo samet dhonaa.

3-Chouthhaai hissa sir ka masaah karna.

4-Dono paanv takhno samet dhona.

WUZU ME FARZ TARK KARNE KA HUKM

Agar koi shakhs ka inme se koi uzoo ya uzoo ka koi hissa  dhone se reh gayaa ho to uski namaaz jaaiz nahi hogi aur usko poori namaaz dobaarah adaa karni laazim hogi.

WUZU KI SUNNATO KA BAYAAN

Wuzu ki sunnato ki taadaad 10 hain

1-Ibtadaa e wuzu me BISMILLAAH padhna

2-Apne haath bartan me daakhil karne se pehle 3 martaba dhona.

3-Miswaak karna

4-Kulli karna

5-Naak me paani daalna aur usko saaf karna

6-Sir ke bache paani se kaano ka masaah karna.

7-Agar daadhi ghani ho to uska ungliyon ke saath khilaal karna aur agar khafeef ho yaani ghani na ho to jism ke chamde tak paani pahunchaana farz hai,aur isi tarah agar paanv ki ungliyaan aapas me mili hui na ho to unka khilaal karna bhi sunnat hai aur agar mili hui ho to unke andar tak paani pahunchaana farz hai.

8-Tamaam aaza ko 3 martaba dhona.

9-Mitti,patthar ya kisi aisi hi saaf kar sakne waali cheez se istanjaa karna.

10-Paani ke paaye jaane ki soorat me isse istanja karna.

WUZU KE MUSTAHBAAT KA BAYAAN

Wuzu me mustahbaat ki kul taadaad 6 hain

1- Wuzu ke ibtidaa me wuzu ki niyat karna.

2-Tamaam wuzu ke aaza ko pay dar pay dhona.

3- Tamaam aazaa ko dhote waqt pehle daanye taraf waale aazaa se aaghaaz karna.

4-Wuzu ki ibtidaa aur tarteeb ka isi andaaz me lihaaz karna jaise ALLAAH TA,AALA ne apni kitaab me farmaaya hai.

5-Masaah karte waqt ek baar saare sir ka ahaata karna.

6-Naye paani ke saath gardan ka masaah karna.

WUZU KE AADAAB KA BAYAAN

Wuzu ke aadaab ki taadaad 6 hain

1-Dauraan wuzu baat cheet karna chhod de.siwaay un duaaon ke jo tamaam aazaa ke dhone ke waqt padhna mustahab hain.

2- Daanye haath se kulli karna ya naak me paani daalna.

3-Baanye haath se naak saaf karna.

4- Baitulkhalaa me istanja ke baad bila wajah satar na khole

5-Dauraan istanjaa qible ki taraf munh na karna,aur uski taraf pusht na karna khawaah ye istanja imaarat me ho ya khuli jagah par wuzu ke liye kiya jaa rahaa ho.

6-Istanjaa imaarat ya khuli jagah par karne ki soorat me sooraj aur chaand ki taraf munh na karna.

WUZU KE NAWAAFIL KA BAYAAN

Nawaafil wuzu  ki kul taadaad 6 hain

1-Wuzu karte waqt qible ki taraf munh karna aur istanja karte waqt qible ki taraf munh na karna.

2-Har wuzu ke uzoo ko dhote waqt uski masnoon duaa padhna.

3-Baitulkhalaa me daakhil hote waqt pehle baanyaa paanv andar rakhe aur nikalte waqt pehle daanyaa paanv baahar rakhe.

4-Shalwaar waghairah par jahaan nijaasat lagne ka andesha ho wahaan paani ke chheente maar le.

5-Paani ke saath istanjaa karne ke baad haath zameen par mal kar dhoye.

6-Haath zameen par malne ke baad dhoye aur aasmaan se zameen tak dekhe aur ye duaa padhe

ALHUMDULILLAAHILLAZEE JA,ALALMAA,A TUHOORAN WALISLAAMA NOORAN WA DALEELAN ILALLAAH WAILAA JANNAATINNAEEM,ALLAHUMMA HASSIN FARJEE WATAHHIR QALBEE WAMAHHIS ZUNOOBEE.

Tarjuma-Tamaam taareefen us allaah ke liye hain jisne paani ko paakeezgi aur islaam ko noor aur Allaah ki taraf jaane aur Jannate Naeem ka raasta banaaya.A ALLAAH mere satar ki hifaazat farmaa aur mere dil ko paak aur mujhe gunaaho se mehfooz farmaa.

WUZU KE MAKROOHAAT

Makroohaat wuzu ki taadaad 6 hain

1-Munh dhote waqt apne chehre par zor se paani maare.

2-Paani me naak saaf karke sanak daalna.

3-Bina kisi majboori ke baanye haath se kulli karna aur naak me paani daalna..

4-Istanja karte waqt baaten karna.

5- paani me paishaab ya paakhaana karna.

6-Kisi bhi haalat me apne satar ko dekhna.

WUZU KE MAMNOOAAT

Wuzu me mamnooaat ki taadaad kul 6 hain

1-Paani istemaal karne me israaf karna woh aise ki farz aazaa ko teen martaba se zyaadah dhona.

2-Paani istemaal karne me kami karna yaani paani ko tail ki maanind istemaal karna.

3-Baghair mozo ke paanv par masaah karna .

4-Aise mozo par masaah karna jo bhut zyaadah phate hue hon.

5-Dauraan wuzu apne satar ko khula rakhna.

6-Bila kisi uzar ke daanye haath se istanjaa karna.

NAWAAQIS WUZU KA BAYAAN

Wuzu ke nawaaqis ki taadaad 10 hain

1-Har woh cheez jo sabeeleen ya ghair sabeeleen se khaarij ho siwaay munh se aam nikalne waale thook ya naak se nikalne waala sinak ya woh paani jo kaano ya aankhon se bila kisi beemaari ke nikaltaa ho.

2-Itni qay karna jo munh bharne ki miqdaar ke baraabar ho.

3-Tek lagaa kar ya takiya lagaa kar ya pehlu ke bal sona.

4- Har rukoo aur sajdah waali namaaz me qahqahaa lagaa kar hansna lihaaza namaaz janaazah me hansne se wuzu nahi tootega albatta namaaz toot jaayegi.

5-Insaan ko junoon ka marz laahaq ho jaane se wuzu toot jaayega.

6-Behosh ho jaane se wuzu toot jaayega.

7-Namaaz ke dauraan khoon ka aabla choos lena ya bade size ki jonk aadmi ka itna khoon choos le jisse woh khoon se bhar jaaye.

8- Aise nashe me mubtala ho jaana  ki aadmi aur aurat me farq na kar sake. aur ye nashaa chaahe afyoon ke khaane se hi ho jaaye ye qaul sahibeen ka hai

aur imaam  saahib ne farmaaya ki:- Agar  is nashe ke saath chalne men ladkhadaahat paidaa ho jaaye to isko nashe me mubtalaa hona kahaa jaayega aur aksar Aimaa karaam ne saahibeen(R.A.) ke qaul ko tarjeeh di hai aur isi ko pasand kiya hai aur fatwaa dene ke liye isi qaul ko ikhtiyaar kiya hai aur yahi sahih hai.

9- Munh se thook ke zariye nikalne waala khoon agar thook par ghaalib aa jaaye ya uske masaavi ho jaaye  to usse bhi wuzu toot jaayega.

10-Wuzu ke hone ya na hone ke baare me shak paidaa ho jaaye jabki isse pehle woh yaqeeni taur par be wuzu tha.

aur agar baawuzu hone me woh yaqeen se tha lekin use shak is baare me paida hua ki na jaane wuzu toota hai ya nahi toota to is soorat me woh bawuzu hi samjhaa jaayega.